ಭೋಪಾಲ್: ಕರ್ನಾಟಕ ಪ್ರದೇಶ ಭಾರತೀಯ ಜನತಾ ಪಕ್ಷದ ಅಧ್ಯಕ್ಷರಾಗಿ ಅಧಿಕಾರ ವಹಿಸಿಕೊಂಡಿರುವ ಬಿ.ವೈ.ವಿಜಯೇಂದ್ರ ಅವರಿಗೆ ಅಭಿನಂದನೆಗಳ ಮಹಾಮಳೆಯಾಗುತ್ತಿದೆ. ಬುಧವಾರ ಅಧಿಕಾರ ವಹಿಸಿಕೊಂಡಿರುವ ವಿಜಯೇಂದ್ರ ಅವರಿಗೆ ಪಕ್ಷದ ಹಿರಿಯ ನಾಯಕ ಸಿ.ಟಿ.ರವಿ ಕಳುಹಿಸಿರುವ ಶುಭ ಹಾರೈಕೆಯ ಸಂದೇಶದ ವೀಡಿಯೊ ಗಮನಸೆಳೆದಿದೆ.
ಆರೆಸ್ಸೆಸ್ ಕಟ್ಟಾಳುವಾಗಿರುವ ಸಿ.ಟಿ.ರವಿ ಅವರು ಕಾರ್ಯಕರ್ತರ ನಡುವೆ ಸಂಭ್ರಮಾಚರಣೆ ಮಾಡುತ್ತಾ ವಿಜಯೇಂದ್ರ ಅವರ ಪದಗ್ರಹಣ ಬಗ್ಗೆ ತಮ್ಮದೇ ಶೈಲಿಯಲ್ಲಿ ಸಂತಸ ವ್ಯಕ್ತಪಡಿಸಿದ್ದಾರೆ. ವಿಜಯೇಂದ್ರ ಅವರ ಚತುರತೆಯನ್ನು ಹಾಡಿ ಹೊಗಳಿರುವ ಸಿ.ಟಿ.ರವಿ, ಪಕ್ಷವನ್ನು ಗಟ್ಟಿಗೊಳಿಸಲು ವಿಜಯೇಂದ್ರ ಸಮರ್ಥರು. ಅವರ ನಾಯಕತ್ವದಲ್ಲಿ ಮುಂಬರುವ ಲೋಕಸಭಾ ಚುನಾವಣೆಯಲ್ಲಿ ಬಿಜೆಪಿ ಹೆಚ್ಚು ಸ್ಥಾನಗಳನ್ನು ಗೆಲ್ಲಲಿದೆ ಎಂದು ಆಶಾವಾದ ವ್ಯಕ್ತಪಡಿಸಿದ್ದಾರೆ. ವಿಜಯೇಂದ್ರ ಅವರು ಎಲ್ಲಾ ನಾಯಕರ ವಿಶ್ವಾಸವನ್ನು ಗಿಟ್ಟಿಸಿಕೊಂಡು ಪಕ್ಷವನ್ನು ಗಟ್ಟಿಗೊಳಿಸಲಿ, ಲೋಕಸಭೆ, ವಿಧಾನ ಪರಿಷತ್, ಜಿಲ್ಲಾ-ತಾಲೂಕು ಪಂಚಾಯತ್ ಸಹಿತ ಮುಂಬರುವ ಚುನಾವಣೆಗಳಲ್ಲಿ ಬಿಜೆಪಿಯನ್ನು ಗೆಲ್ಲಿಸುವ ಸಾಮರ್ಥ್ಯವನ್ನು ದೇವರು ವಿಜಯೇಂದ್ರರಿಗೆ ಕರುಣಿಸಲಿ ಎಂದು ರವಿ ಪ್ರಾರ್ಥಿಸಿದ್ದಾರೆ.
View this post on Instagram
‘ಜೈಶ್ರೀರಾಮ್’ ಎಂದ ಸಿ.ಟಿ.ರವಿ
ಮಧ್ಯ ಪ್ರದೇಶ ಚುನಾವಣಾ ಪ್ರಚಾರ ಸ್ಥಳದಿಂದಲೇ ಸಂದೇಶ ರವಾನಿಸಿರುವ ಸಿ.ಟಿ.ರವಿ, ‘ಜೈ ಶ್ರೀ ರಾಮ್’ ಘೋಷಣೆ ಕೂಗುತ್ತಾ ವಿಜಯೇಂದ್ರ ಅವರ ಸಾಮರ್ಥ್ಯವನ್ನು ಹಾಡಿ ಹೊಗಳಿದ್ದಾರೆ. ‘ಭಾವನೆ ತಮ್ಮ ಜೊತೆಗಿದೆ. ಪಕ್ಷ ಕಟ್ಟಲು ಸದಾಕಾಲ ತಮ್ಮ ಜೊತೆಗಿರುತ್ತೇನೆ’ ಎಂದು ನೂತನ ರಾಜ್ಯಾಧ್ಯಕ್ಷ ವಿಜಯೇಂದ್ರರಿಗೆ ಭರವಸೆ ನೀಡಿರುವ ರವಿ ವೈಖರಿಯು ಬಿಜೆಪಿ ಕಾರ್ಯಕರ್ತರಿಗೂ ಸ್ಫೂರ್ತಿಯಂತಿದೆ.
ಈ ವರೆಗೂ ಬಿಜೆಪಿ ರಾಜ್ಯಾಧ್ಯಕ್ಷರಾಗಿ ಪಕ್ಷ ಸಂಘಟಿಸಿರುವ ನಳಿನ್ ಕುಮಾರ್ ಕಟೀಲ್ ಅವರನ್ನೂ ಅಭಿನಂದಿಸಿರುವ ಸಿ.ಟಿ.ರವಿ, ಅವರು ಶಕ್ತಿ ಮೀರಿ ಕೆಲಸ ಮಾಡಿದ್ದಾರೆ ಎಂದು ಪ್ರಶಂಸಿಸಿದರು. ಪಕ್ಷ ಬಲಗೊಳಿಸುವಲ್ಲಿ ಅವಿರತ ಶ್ರಮಸಿಸಿದ ನಳಿನ್ ಕುಮಾರ್ ಕಟೀಲ್ ಅವರಿಗೆ ಕೃತಜ್ಞತೆ ಸಲ್ಲಿಸಿದರು.
