ನವದೆಹಲಿ: FASTag ಬಳಕೆದಾರರು ವಾಹನಕ್ಕೆ ಅಂಟಿಸಿರುವ ಭೌತಿಕ ಟ್ಯಾಗ್ ಬದಲಾಯಿಸದೇ, ಅದನ್ನು ನೀಡಿರುವ ಬ್ಯಾಂಕ್ನ್ನು ಬದಲಾಯಿಸಿಕೊಳ್ಳಲು ಅನುಕೂಲವಾಗುವ ‘OneTag’ FASTag ಪೋರ್ಟಬಿಲಿಟಿ ಸೇವೆಯನ್ನು NHAIಯ ‘ರಾಜಮಾರ್ಗಯಾತ್ರಾ’ ಮೊಬೈಲ್ ಆ್ಯಪ್ನಲ್ಲಿ ಪರಿಚಯಿಸಲಾಗಿದೆ.
ಈ ಸೇವೆಯಿಂದ ಬಳಕೆದಾರರಿಗೆ FASTag ನೀಡುವ ಬ್ಯಾಂಕ್ ಆಯ್ಕೆ ಮಾಡಿಕೊಳ್ಳುವ ಹೆಚ್ಚಿನ ಸ್ವಾತಂತ್ರ್ಯ ದೊರೆಯಲಿದೆ. ಈಗಾಗಲೇ ಆ್ಯಪ್ನಲ್ಲಿ ಲಭ್ಯವಿರುವ FASTag ವಾರ್ಷಿಕ ಪಾಸ್, ಸ್ಥಳೀಯ ಪಾಸ್ ಹಾಗೂ 1033 ತುರ್ತು ಸಹಾಯವಾಣಿ ಸೇವೆಗಳಿಗೂ ಇದು ಸೇರ್ಪಡೆಯಾಗಿದೆ.
ಹೇಗೆ ಕಾರ್ಯನಿರ್ವಹಿಸುತ್ತದೆ?
ಬಳಕೆದಾರರು ರಾಜಮಾರ್ಗಯಾತ್ರಾ ಆ್ಯಪ್ನಲ್ಲಿ ವಾಹನ ನೋಂದಣಿ ಸಂಖ್ಯೆಯನ್ನು ನಮೂದಿಸಿ OneTagಗೆ ಅರ್ಹತೆಯನ್ನು ಪರಿಶೀಲಿಸಬಹುದು. ಬಳಿಕ ಪ್ರಸ್ತುತ FASTag ನೀಡಿರುವ ಬ್ಯಾಂಕ್ನಿಂದ ಆರು ಅಂಕಿಯ ಮೊಬೈಲ್ ಪರಿಶೀಲನಾ ಕೋಡ್ (MVC) ಪಡೆದು ದೃಢೀಕರಣ ಪೂರ್ಣಗೊಳಿಸಬೇಕು.
ನಂತರ ಹೊಸ ಬ್ಯಾಂಕ್ ಆಯ್ಕೆ ಮಾಡಿಕೊಂಡು ಗ್ರಾಹಕ ಪರಿಶೀಲನೆ ಪೂರ್ಣಗೊಳಿಸಿ ಹೊಸ ಬ್ಯಾಂಕ್ನ ವಾಲೆಟ್ ಸಕ್ರಿಯಗೊಳಿಸಬಹುದು. ಪ್ರಕ್ರಿಯೆ ಪೂರ್ಣಗೊಂಡ ಬಳಿಕ FASTag ID ಬದಲಾಗುವುದಿಲ್ಲ. ಹೀಗಾಗಿ ಅದೇ ಭೌತಿಕ ಟ್ಯಾಗ್ ಹೊಸ ಬ್ಯಾಂಕ್ನೊಂದಿಗೆ ಮುಂದುವರಿಯುತ್ತದೆ.
ಹಳೆಯ ಬ್ಯಾಂಕ್ ಅಸ್ತಿತ್ವದಲ್ಲಿರುವ ವಾಲೆಟ್ ಮುಚ್ಚಿ, ಅಗತ್ಯ ಹೊಂದಾಣಿಕೆಗಳ ಬಳಿಕ ಉಳಿದ ಮೊತ್ತವನ್ನು ಮರುಪಾವತಿಸುತ್ತದೆ. ಪೋರ್ಟ್ ಮಾಡಲಾದ FASTag ಅನ್ನು ಮತ್ತೆ ಬದಲಾಯಿಸಲು ಆರು ತಿಂಗಳ ಕೂಲಿಂಗ್-ಆಫ್ ಅವಧಿ ಇರಲಿದೆ.
ವೆಚ್ಚ ಕಡಿತಕ್ಕೂ ಸಹಕಾರಿ
ಭೌತಿಕ FASTagಗಳ ಪುನರಾವರ್ತಿತ ಉತ್ಪಾದನೆ, ರವಾನೆ ಮತ್ತು ಮರು ವಿತರಣೆಯನ್ನು ಕಡಿಮೆ ಮಾಡುವ ಮೂಲಕ ಜೀವನಚಕ್ರ ನಿರ್ವಹಣೆ ಹಾಗೂ ಕಾರ್ಯಾಚರಣಾ ವೆಚ್ಚ ತಗ್ಗಿಸಲು OneTag ನೆರವಾಗಲಿದೆ ಎಂದು NHAI ತಿಳಿಸಿದೆ.
ದೇಶದಲ್ಲಿ FASTag ಬಳಕೆ ಪ್ರಮಾಣ 98%ಕ್ಕೂ ಅಧಿಕವಾಗಿದ್ದು, ಸುಮಾರು 13 ಕೋಟಿ ಬಳಕೆದಾರರು ಇದ್ದಾರೆ. ಈ ಹಿನ್ನೆಲೆಯಲ್ಲಿ ಹೊಸ ಸೇವೆಯು ಡಿಜಿಟಲ್ ಟೋಲ್ ಸಂಗ್ರಹ ವ್ಯವಸ್ಥೆಯನ್ನು ಮತ್ತಷ್ಟು ಸರಳಗೊಳಿಸುವ ನಿರೀಕ್ಷೆಯಿದೆ.
