ನಟ ಸೂರ್ಯ ಅಭಿನಯದ ಬಹುನಿರೀಕ್ಷಿತ ‘ಸೀನ್’ ಚಿತ್ರದ ಟ್ರೇಲರ್ ಬಿಡುಗಡೆಯಾಗಿದೆ. ಜಿತು ಮಾಧವನ್ ನಿರ್ದೇಶನದ ಈ ಚಿತ್ರ ನವೆಂಬರ್ 6ರಂದು ದೀಪಾವಳಿ ಪ್ರಯುಕ್ತ ವಿಶ್ವದಾದ್ಯಂತ ತೆರೆಗೆ ಬರಲಿದೆ.
‘ಮರ್ಡರ್, ಮಿಸ್ಟರಿ, ಮ್ಯಾಡ್ನೆಸ್ ಮತ್ತು ನಗು’ ಎಂದು ಸೂರ್ಯ ಟ್ರೇಲರ್ ಹಂಚಿಕೊಂಡಿದ್ದಾರೆ. ಚಿತ್ರದಲ್ಲಿ ಅವರು ಇನ್‌ಬರಾಜ್ ಎಂಬ ಪೊಲೀಸ್ ಅಧಿಕಾರಿಯ ಪಾತ್ರದಲ್ಲಿ ಕಾಣಿಸಿಕೊಂಡಿದ್ದು, ಇಲಾಖೆಗೆ ರಾಜೀನಾಮೆ ನೀಡಿ ರಾಜಕೀಯ ಪ್ರವೇಶಿಸುವುದಾಗಿ ಹೇಳುತ್ತಾರೆ.
ನಟ ಲಾಲ್ ಮೇಲಾಧಿಕಾರಿ ಸ್ಟೀಫನ್ ಪಾತ್ರದಲ್ಲಿ, ನಜ್ರಿಯಾ ಮನೆಗೆಲಸದವಳಾಗಿ ಬರುವ ಮಾಯಾ ಪಾತ್ರದಲ್ಲಿ ಹಾಗೂ ನಸ್ಲೆನ್ ನಿರ್ದಯಿ ಅಪರಾಧಿ ಈಶ್ವರನ್ ಪಾತ್ರದಲ್ಲಿ ಅಭಿನಯಿಸಿದ್ದಾರೆ. ನಜ್ರಿಯಾ ಸಾಹಸ ದೃಶ್ಯಗಳಲ್ಲೂ ಕಾಣಿಸಿಕೊಂಡಿದ್ದಾರೆ.
ಬುದ್ಧಿವಂತಿಕೆಯ ಪೈಪೋಟಿ ಮತ್ತು ಅಪರಾಧದ ಸುತ್ತ ಸಾಗುವ ಕಥೆಯ ಸುಳಿವನ್ನು ಟ್ರೇಲರ್ ನೀಡಿದೆ. ಜಹಾಗರಂ ಸ್ಟುಡಿಯೋಸ್ ನಿರ್ಮಾಣದ ಚಿತ್ರಕ್ಕೆ ಸುಶಿನ್ ಶ್ಯಾಮ್ ಸಂಗೀತ, ವಿನೀತ್ ಆಗಸ್ಟಿಯನ್ ಛಾಯಾಗ್ರಹಣ ಮತ್ತು ಅಜ್ಮಲ್ ಸಾಬು ಸಂಕಲನವಿದೆ. ಸೂರ್ಯ-ಜಿತು ಮಾಧವನ್ ಮೊದಲ ಜಂಟಿ ಚಿತ್ರ ಇದಾಗಿದೆ.
