ವಾಷಿಂಗ್ಟನ್: ಅಮೆರಿಕ ಅಧ್ಯಕ್ಷ ಡೊನಾಲ್ಡ್ ಟ್ರಂಪ್ ಅವರು ಸುದ್ದಿಗೋಷ್ಠಿಯಲ್ಲಿ ಪತ್ರಕರ್ತರೊಬ್ಬರ ದೈಹಿಕ ನೋಟದ ಬಗ್ಗೆ ಅವಹೇಳನಕಾರಿ ಹೇಳಿಕೆ ನೀಡುವ ಮೂಲಕ ಹೊಸ ವಿವಾದಕ್ಕೆ ಕಾರಣರಾಗಿದ್ದಾರೆ. ತಮ್ಮ ಆರೋಗ್ಯ ಹಾಗೂ ರದ್ದುಗೊಳಿಸಿರುವ ಚುನಾವಣಾ ಪ್ರಚಾರ ಸಭೆಗಳ ಕುರಿತು ಪ್ರಶ್ನಿಸಿದ ಪತ್ರಕರ್ತನಿಗೆ ವೈಯಕ್ತಿಕವಾಗಿ ನಿಂದಿಸಿರುವುದು ಚರ್ಚೆಗೆ ಗ್ರಾಸವಾಗಿದೆ.
ದೇಶಾದ್ಯಂತ ನಿರಂತರವಾಗಿ ಚುನಾವಣಾ ಪ್ರಚಾರ ನಡೆಸುತ್ತಿರುವುದರಿಂದ ಸುಸ್ತಾಗಿದೆಯೇ ಎಂಬ ಪ್ರಶ್ನೆಯನ್ನು ಪತ್ರಕರ್ತ ಕೇಳಿದ್ದರು. ಕಾನ್ಸಾಸ್‌ನಲ್ಲಿ ಆಯೋಜಿಸಿದ್ದ ಪ್ರಚಾರ ಸಭೆಯನ್ನು ರದ್ದುಗೊಳಿಸಿರುವುದಕ್ಕೆ ಇದೇ ಕಾರಣವೇ ಎಂದು ಅವರು ಪ್ರಶ್ನಿಸಿದ್ದರು.
ಇದಕ್ಕೆ ತೀವ್ರ ಅಸಮಾಧಾನ ವ್ಯಕ್ತಪಡಿಸಿದ ಟ್ರಂಪ್, ಪತ್ರಕರ್ತನನ್ನು ಉದ್ದೇಶಿಸಿ, ಇಂತಹ ಪ್ರಶ್ನೆ ಕೇಳಲು ನಿನಗೆ ಅನಾರೋಗ್ಯವಿದೆಯೇ ಎಂದು ಪ್ರಶ್ನಿಸಿದರು. ಅಧ್ಯಕ್ಷರ ಆರೋಗ್ಯದ ಬಗ್ಗೆ ತಿಳಿದುಕೊಳ್ಳುವ ಉದ್ದೇಶದಿಂದ ಪ್ರಶ್ನಿಸಿದ್ದಾಗಿ ಪತ್ರಕರ್ತ ಸ್ಪಷ್ಟಪಡಿಸಿದರೂ ಟ್ರಂಪ್ ತಮ್ಮ ವೈಯಕ್ತಿಕ ವಾಗ್ದಾಳಿಯನ್ನು ಮುಂದುವರಿಸಿದರು.
ಪತ್ರಕರ್ತನನ್ನು ಅನುಕರಿಸಿದ ಟ್ರಂಪ್, ಆತನ ದೈಹಿಕ ಸಾಮರ್ಥ್ಯವನ್ನು ವ್ಯಂಗ್ಯವಾಡಿದರು. ಬಳಿಕ, ‘ನೀನು ನೋಡಲು ಅಸಹ್ಯವಾಗಿದ್ದೀಯ. ಮೊದಲು ನಿನ್ನ ದೇಹದ ಆಕಾರ ಸರಿಪಡಿಸಿಕೋ’ ಎಂದು ಟೀಕಿಸಿದರು. ಇದೇ ವೇಳೆ, ಕಳೆದ ಎರಡು ವಾರಗಳಿಂದ ತಮ್ಮನ್ನು ಗಮನಿಸುತ್ತಿರುವ ಪತ್ರಕರ್ತರಿಗೆ ತಾವು ಸಂಪೂರ್ಣ ಆರೋಗ್ಯವಾಗಿರುವುದು ತಿಳಿದಿರಬೇಕು ಎಂದು ಸಮರ್ಥಿಸಿಕೊಂಡರು.
ನವೆಂಬರ್ 3ರಂದು ನಡೆಯಲಿರುವ ಮಧ್ಯಂತರ ಚುನಾವಣೆಗೂ ಮುನ್ನ ರಿಪಬ್ಲಿಕನ್ ಅಭ್ಯರ್ಥಿಗಳ ಪರವಾಗಿ ಕಾನ್ಸಾಸ್ ಮತ್ತು ಅಯೋವಾದಲ್ಲಿ ಆಯೋಜಿಸಿದ್ದ ಪ್ರಚಾರ ಸಭೆಗಳನ್ನು ಟ್ರಂಪ್ ರದ್ದುಗೊಳಿಸಿದ್ದಾರೆ. ಶನಿವಾರ ಕಾನ್ಸಾಸ್‌ನ ಸಲಿನಾ ಮತ್ತು ಭಾನುವಾರ ಅಯೋವಾದ ಡಬ್ಯೂಕ್‌ನಲ್ಲಿ ಸಭೆಗಳು ನಡೆಯಬೇಕಿದ್ದವು.
ಕಾನ್ಸಾಸ್‌ಗೆ ತೆರಳುವ ಅಗತ್ಯವಿಲ್ಲ ಎಂದು ಹೇಳಿದ್ದ ಟ್ರಂಪ್, ರಿಪಬ್ಲಿಕನ್ ಸೆನೆಟರ್ ರೋಜರ್ ಮಾರ್ಷಲ್ ಗೆಲುವಿನ ಬಗ್ಗೆ ವಿಶ್ವಾಸ ವ್ಯಕ್ತಪಡಿಸಿದ್ದರು. ಬಳಿಕ ಅಯೋವಾದ ಸಭೆಯನ್ನೂ ರದ್ದುಗೊಳಿಸಿರುವುದನ್ನು ರಿಪಬ್ಲಿಕನ್ ರಾಷ್ಟ್ರೀಯ ಸಮಿತಿ ದೃಢಪಡಿಸಿತು.
ಇದಕ್ಕೆ ಪರ್ಯಾಯವಾಗಿ ಟ್ರಂಪ್ ಅವರ ಚುನಾವಣಾ ಪ್ರಚಾರ ನಿಧಿ ಸಂಸ್ಥೆ ‘ಮ್ಯಾಗಾ ಇಂಕ್.’ ಕನಿಷ್ಠ 19 ರಾಜ್ಯಗಳಲ್ಲಿ ಆನ್‌ಲೈನ್ ಪ್ರಚಾರ ಸಭೆಗಳನ್ನು ಆಯೋಜಿಸಲು ಮುಂದಾಗಿದೆ. ಅಕ್ಟೋಬರ್ 1ರಿಂದ ಈವರೆಗೆ ಟ್ರಂಪ್ 19 ರಾಜ್ಯಗಳಲ್ಲಿ ರಿಪಬ್ಲಿಕನ್ ಅಭ್ಯರ್ಥಿಗಳ ಪರ 25 ಪ್ರಚಾರ ಸಭೆಗಳಲ್ಲಿ ಭಾಗವಹಿಸಿದ್ದಾರೆ.
ಮಧ್ಯಂತರ ಚುನಾವಣೆಗಳಲ್ಲಿ ಸೆನೆಟ್ ಮತ್ತು ಹೌಸ್ ಆಫ್ ರೆಪ್ರೆಸೆಂಟೇಟಿವ್ಸ್ ಎರಡರಲ್ಲೂ ರಿಪಬ್ಲಿಕನ್ ಪಕ್ಷ ತನ್ನ ಬಹುಮತ ಉಳಿಸಿಕೊಳ್ಳುವುದೇ ಎಂಬುದು ನಿರ್ಧಾರವಾಗಲಿದೆ. ಎರಡು ಸಭೆಗಳನ್ನು ರದ್ದುಗೊಳಿಸಿದ್ದರೂ ಶುಕ್ರವಾರ ಫ್ಲೋರಿಡಾದಲ್ಲಿ ನಡೆಯಲಿರುವ ಮತ್ತೊಂದು ಕಾರ್ಯಕ್ರಮದಲ್ಲಿ ಟ್ರಂಪ್ ಭಾಗವಹಿಸುವ ನಿರೀಕ್ಷೆಯಿದೆ.
