ನವದೆಹಲಿ: ಲಡಾಖ್ನಲ್ಲಿ ಕೇವಲ 23 ದಿನಗಳಲ್ಲಿ 6,000 ಮೀಟರ್ಗಿಂತಲೂ ಅಧಿಕ ಎತ್ತರದ, ಈ ಹಿಂದೆ ಯಾರೂ ಏರದ 20 ಶಿಖರಗಳನ್ನು ಯಶಸ್ವಿಯಾಗಿ ಏರಿದ ಭಾರತೀಯ ಪರ್ವತಾರೋಹಣ ತಂಡವನ್ನು ರಕ್ಷಣಾ ಸಚಿವ ರಾಜನಾಥ್ ಸಿಂಗ್ ಶುಕ್ರವಾರ ಸ್ವಾಗತಿಸಿದರು.
ಈ ಅಭಿಯಾನದಲ್ಲಿ ಲಡಾಖ್ನ ಚಮ್ಸರ್–ಲುಂಗ್ಸರ್, ಗ್ಯಮಾ ನಾಲಾ ಹಾಗೂ ಚೋಕುಲಾ ಪ್ರದೇಶಗಳಲ್ಲಿರುವ ಹೊಸ ಶಿಖರಗಳನ್ನು ತಂಡ ಏರಿದೆ. ಈ ಮೂಲಕ ಈ ಪ್ರದೇಶದಲ್ಲಿ ಹಿಂದೆ ಏರಿಕೆಯಾಗದ 20 ಶಿಖರಗಳನ್ನು ಒಂದೇ ಅಭಿಯಾನದಲ್ಲಿ ಯಶಸ್ವಿಯಾಗಿ ಏರಿದ ಮಹತ್ವದ ಸಾಧನೆ ದಾಖಲಾಗಿದೆ.
ಡಿರಾಂಗ್ನ ನ್ಯಾಷನಲ್ ಇನ್ಸ್ಟಿಟ್ಯೂಟ್ ಆಫ್ ಮೌಂಟೇನಿಯರಿಂಗ್ ಅಂಡ್ ಅಡ್ವೆಂಚರ್ ಸ್ಪೋರ್ಟ್ಸ್ (NIMAS)ನ 20 ಅನುಭವಿ ಪರ್ವತಾರೋಹಿಗಳು ಈ ಸಾಹಸದಲ್ಲಿ ಭಾಗವಹಿಸಿದ್ದರು. ಕರ್ನಲ್ ರಣವೀರ್ ಸಿಂಗ್ ಜಮ್ವಾಲ್ ತಂಡವನ್ನು ಮುನ್ನಡೆಸಿದ್ದರು.
ನವದೆಹಲಿಯ ಕರ್ತವ್ಯ ಭವನ-2ರಲ್ಲಿ ನಡೆದ ಸ್ವಾಗತ ಸಮಾರಂಭದಲ್ಲಿ ತಂಡದ ಸದಸ್ಯರೊಂದಿಗೆ ಸಂವಾದ ನಡೆಸಿದ ರಾಜನಾಥ್ ಸಿಂಗ್, ಪರ್ವತಾರೋಹಿಗಳ ಧೈರ್ಯ, ದೃಢನಿಶ್ಚಯ, ಶಿಸ್ತು ಹಾಗೂ ತಂಡದ ಸಮನ್ವಯವನ್ನು ಶ್ಲಾಘಿಸಿದರು.
ಅತ್ಯಂತ ಕಠಿಣ ಹವಾಮಾನ ಹಾಗೂ ಎತ್ತರದ ಭೂಪ್ರದೇಶದಲ್ಲಿ 20 ಹೊಸ ಶಿಖರಗಳನ್ನು ಕೇವಲ 23 ದಿನಗಳಲ್ಲಿ ಏರಿರುವುದು ಭಾರತದ ಪರ್ವತಾರೋಹಣ ಸಾಮರ್ಥ್ಯವನ್ನು ತೋರಿಸುತ್ತದೆ ಎಂದು ರಾಜನಾಥ್ ಸಿಂಗ್ ಹೇಳಿದರು.
ಅಭಿಯಾನಕ್ಕೆ ವ್ಯಾಪಕ ಯೋಜನೆ, ತಾಂತ್ರಿಕ ಪರಿಣತಿ, ದೈಹಿಕ ಸಾಮರ್ಥ್ಯ ಮತ್ತು ಅಪಾರ ಸಹಿಷ್ಣುತೆಯ ಅಗತ್ಯವಿತ್ತು. ತಂಡದ ಯಶಸ್ಸು ದೇಶದ ಯುವಜನರನ್ನು ಪರ್ವತಾರೋಹಣ, ಸಾಹಸ ಕ್ರೀಡೆ ಹಾಗೂ ಅನ್ವೇಷಣೆಯತ್ತ ಪ್ರೇರೇಪಿಸಲಿದೆ ಎಂದು ಅವರು ಹೇಳಿದರು.
ರಕ್ಷಣಾ ಸಚಿವಾಲಯದ ಪ್ರಕಾರ, ಭಾರತದ ಎತ್ತರದ ಗಡಿ ಪ್ರದೇಶಗಳಲ್ಲಿ ಸಾಹಸ ಮತ್ತು ಅನ್ವೇಷಣಾ ಚಟುವಟಿಕೆಗಳನ್ನು ಉತ್ತೇಜಿಸುವುದು ಹಾಗೂ ಮುಂದಿನ ಪೀಳಿಗೆಯಲ್ಲಿ ಪರ್ವತಾರೋಹಣದ ಆಸಕ್ತಿ ಬೆಳೆಸುವುದು ಈ ಅಭಿಯಾನದ ಪ್ರಮುಖ ಉದ್ದೇಶವಾಗಿತ್ತು.
ಈ ಸಾಧನೆಯು ಎತ್ತರದ ಪ್ರದೇಶಗಳ ಅನ್ವೇಷಣೆ ಮತ್ತು ಪರ್ವತಾರೋಹಣ ಕ್ಷೇತ್ರದಲ್ಲಿ ಭಾರತದ ಸಾಮರ್ಥ್ಯಕ್ಕೆ ಮತ್ತೊಂದು ಮಹತ್ವದ ಸೇರ್ಪಡೆಯಾಗಿದೆ.
ಕಾರ್ಯಕ್ರಮದಲ್ಲಿ ರಕ್ಷಣಾ ಕಾರ್ಯದರ್ಶಿ ರಾಜೇಶ್ ಕುಮಾರ್ ಸಿಂಗ್ ಸೇರಿದಂತೆ ರಕ್ಷಣಾ ಸಚಿವಾಲಯದ ಹಿರಿಯ ಅಧಿಕಾರಿಗಳು ಉಪಸ್ಥಿತರಿದ್ದರು.
