ನವದೆಹಲಿ: ನಕಲಿ, ಕಲಬೆರಕೆ ಹಾಗೂ ಕಳಪೆ ಗುಣಮಟ್ಟದ ಬೀಜಗಳ ಮಾರಾಟಕ್ಕೆ ಕಡಿವಾಣ ಹಾಕಲು ಕೇಂದ್ರ ಸರ್ಕಾರ ಕಠಿಣ ಹೊಸ ಬೀಜ ಕಾಯ್ದೆ ರೂಪಿಸುತ್ತಿದೆ. ಪ್ರಸ್ತಾವಿತ ಕಾಯ್ದೆಯನ್ನು ಅಂತಿಮಗೊಳಿಸುವ ಮುನ್ನ ರೈತ ಸಂಘಟನೆಗಳ ಅಭಿಪ್ರಾಯ ಪಡೆಯಲು ಕೇಂದ್ರ ಕೃಷಿ ಸಚಿವ ಶಿವರಾಜ್ ಸಿಂಗ್ ಚೌಹಾಣ್ ಸೆಪ್ಟೆಂಬರ್ 10ರಂದು ನವದೆಹಲಿಯಲ್ಲಿ ರಾಷ್ಟ್ರವ್ಯಾಪಿ ಸಮಾಲೋಚನೆ ನಡೆಸಲಿದ್ದಾರೆ.
ಕೃಷಿ ಭವನದಲ್ಲಿ ಸಂಜೆ 4 ಗಂಟೆಗೆ ನಡೆಯುವ ಸಭೆಯಲ್ಲಿ ವಿವಿಧ ರಾಜ್ಯಗಳ ಪ್ರಮುಖ ರೈತ ಸಂಘಟನೆಗಳ ಹಿರಿಯ ಪ್ರತಿನಿಧಿಗಳು ಭಾಗವಹಿಸುವ ನಿರೀಕ್ಷೆಯಿದೆ. ಕರ್ನಾಟಕ, ತೆಲಂಗಾಣ, ಮಹಾರಾಷ್ಟ್ರ, ಗುಜರಾತ್, ರಾಜಸ್ಥಾನ, ಬಿಹಾರ, ತಮಿಳುನಾಡು, ಜಾರ್ಖಂಡ್ ಮತ್ತು ಕೇರಳದ ರೈತ ಪ್ರತಿನಿಧಿಗಳು ತಮ್ಮ ಸಲಹೆ ಹಾಗೂ ಕಳವಳಗಳನ್ನು ಸಚಿವರ ಮುಂದಿಡಲಿದ್ದಾರೆ.
ಭಾರೀ ದಂಡ, ಜೈಲು ಶಿಕ್ಷೆ?
ಪ್ರಸ್ತಾವಿತ ಕಾನೂನಿನಡಿ ನಕಲಿ ಅಥವಾ ಕಳಪೆ ಗುಣಮಟ್ಟದ ಬೀಜಗಳನ್ನು ಮಾರಾಟ ಮಾಡುವ ಕಂಪನಿಗಳು ಹಾಗೂ ವ್ಯಾಪಾರಿಗಳ ವಿರುದ್ಧ ಕಠಿಣ ಕ್ರಮ ಕೈಗೊಳ್ಳುವ ಸಾಧ್ಯತೆಯಿದೆ. ಭಾರೀ ದಂಡದ ಜತೆಗೆ ಜೈಲು ಶಿಕ್ಷೆ ವಿಧಿಸುವ ಅವಕಾಶವೂ ಇರಲಿದೆ ಎಂದು ತಿಳಿಸಲಾಗಿದೆ.
ಬೀಜಗಳ ಗುಣಮಟ್ಟಕ್ಕೆ ಬಲವಾದ ಮಾನದಂಡ ರೂಪಿಸುವುದು ಹಾಗೂ ಉತ್ಪಾದನೆಯಿಂದ ಮಾರಾಟದವರೆಗೆ ಬೀಜಗಳನ್ನು ಪತ್ತೆಹಚ್ಚಲು ಅಂತ್ಯದಿಂದ-ಅಂತ್ಯದ ಟ್ರೇಸಬಿಲಿಟಿ ವ್ಯವಸ್ಥೆ ಜಾರಿಗೆ ತರುವುದು ಸರ್ಕಾರದ ಉದ್ದೇಶವಾಗಿದೆ. ಸಾಂಪ್ರದಾಯಿಕ ಬೀಜಗಳ ಮೇಲಿನ ರೈತರ ಹಕ್ಕುಗಳ ರಕ್ಷಣೆಯನ್ನೂ ಕಾಯ್ದೆಯಲ್ಲಿ ಖಚಿತಪಡಿಸುವ ನಿರೀಕ್ಷೆಯಿದೆ.
ಬೆಳೆ ನಷ್ಟದಿಂದ ರೈತರ ರಕ್ಷಣೆ
ಕಳಪೆ ಬೀಜಗಳಿಂದ ಬೆಳೆ ವೈಫಲ್ಯ ಉಂಟಾದರೆ ರೈತರು ಬೀಜ, ಗೊಬ್ಬರ, ಕಾರ್ಮಿಕ ವೆಚ್ಚ ಸೇರಿದಂತೆ ತಿಂಗಳುಗಳ ಹೂಡಿಕೆ ಮತ್ತು ಶ್ರಮವನ್ನು ಕಳೆದುಕೊಳ್ಳಬೇಕಾಗುತ್ತದೆ. ಹೀಗಾಗಿ ನಿಯಂತ್ರಕ ವ್ಯವಸ್ಥೆಯಲ್ಲಿರುವ ಅಂತರವನ್ನು ನಿವಾರಿಸಿ, ನಕಲಿ ಬೀಜದ ಜಾಲಕ್ಕೆ ಕಡಿವಾಣ ಹಾಕುವುದು ಹೊಸ ಕಾಯ್ದೆಯ ಪ್ರಮುಖ ಉದ್ದೇಶವಾಗಿದೆ.
ಭಾರತೀಯ ಕಿಸಾನ್ ಸಂಘ, ಭಾರತೀಯ ಕಿಸಾನ್ ಒಕ್ಕೂಟದ ವಿವಿಧ ಬಣಗಳು, ಅಖಿಲ ಭಾರತ ಕಿಸಾನ್ ಸಮನ್ವಯ ಸಮಿತಿ, ಕಿಸಾನ್ ಮಹಾಪಂಚಾಯತ್, ಭಾರತೀಯ ಕೃಷಕ್ ಸಮಾಜ ಸೇರಿದಂತೆ ಹಲವು ಸಂಘಟನೆಗಳ ಪ್ರತಿನಿಧಿಗಳು ಸಭೆಯಲ್ಲಿ ಪಾಲ್ಗೊಳ್ಳುವ ನಿರೀಕ್ಷೆಯಿದೆ.
ಮುಂಬರುವ ಸಂಸತ್ ಅಧಿವೇಶನಕ್ಕೂ ಮುನ್ನ ನಡೆಯುತ್ತಿರುವ ಈ ಸಮಾಲೋಚನೆ, ಹೊಸ ಬೀಜ ಶಾಸನ ಅಂತಿಮಗೊಳಿಸುವ ಪ್ರಕ್ರಿಯೆಯಲ್ಲಿ ಮಹತ್ವದ ಹೆಜ್ಜೆಯಾಗಿದೆ. ರೈತರ ಅನುಭವ ಮತ್ತು ಸಲಹೆಗಳನ್ನು ಒಳಗೊಂಡ ಬಲಿಷ್ಠ ನಿಯಂತ್ರಣ ವ್ಯವಸ್ಥೆ ರೂಪಿಸುವುದು ಸರ್ಕಾರದ ಉದ್ದೇಶ ಎಂದು ಸಚಿವ ಚೌಹಾಣ್ ಹೇಳಿದ್ದಾರೆ.
