ನವದೆಹಲಿ: ವಂಚನೆಯ ರೀತಿಯಲ್ಲಿ ಸಿಮ್ ಕಾರ್ಡ್ ವಿತರಣೆ, ಟೆಲಿಕಾಂ ಐಡೆಂಟಿಫೈಯರ್ಗಳ ದುರುಪಯೋಗ ಹಾಗೂ ಮೊಬೈಲ್ಗಳ IMEI ಸಂಖ್ಯೆ ತಿರುಚುವುದರ ವಿರುದ್ಧ ದೂರಸಂಪರ್ಕ ಇಲಾಖೆ (DoT) ನಾಗರಿಕರಿಗೆ ಎಚ್ಚರಿಕೆ ನೀಡಿದೆ. ಇಂತಹ ಉಲ್ಲಂಘನೆಗಳಿಗೆ ದೂರಸಂಪರ್ಕ ಕಾಯ್ದೆ, 2023ರ ಅಡಿಯಲ್ಲಿ ಮೂರು ವರ್ಷಗಳವರೆಗೆ ಜೈಲು ಶಿಕ್ಷೆ ಮತ್ತು ₹50 ಲಕ್ಷದವರೆಗೆ ದಂಡ ವಿಧಿಸಬಹುದಾಗಿದೆ.
ಛತ್ತೀಸ್ಗಢದಲ್ಲಿ ಪಾಯಿಂಟ್ ಆಫ್ ಸೇಲ್ (PoS) ಏಜೆಂಟ್ವೊಬ್ಬರು ನಾಗರಿಕರ ಗುರುತಿನ ದಾಖಲೆಗಳನ್ನು ದುರುಪಯೋಗಪಡಿಸಿಕೊಂಡು, ಅವರ ಅರಿವು ಅಥವಾ ಒಪ್ಪಿಗೆಯಿಲ್ಲದೆ 25 ಸಿಮ್ಗಳನ್ನು ಸಕ್ರಿಯಗೊಳಿಸಿರುವುದು ಪತ್ತೆಯಾದ ಹಿನ್ನೆಲೆಯಲ್ಲಿ DoT ಈ ಸಲಹೆ ನೀಡಿದೆ.
ಪ್ರಕರಣದ ಬಳಿಕ DoT ಮತ್ತು ಟೆಲಿಕಾಂ ಸೇವಾ ಪೂರೈಕೆದಾರರು ಸಂಬಂಧಪಟ್ಟ PoS ಏಜೆಂಟ್ರನ್ನು ಕಪ್ಪುಪಟ್ಟಿಗೆ ಸೇರಿಸಿದ್ದು, 25 ಸಂಪರ್ಕಗಳನ್ನು ಪರಿಶೀಲನೆಗೆ ಒಳಪಡಿಸಲಾಯಿತು. ಮರುಪರಿಶೀಲನೆಯಲ್ಲಿ ವಿಫಲವಾದ ಸಂಪರ್ಕಗಳನ್ನು ನಿಷ್ಕ್ರಿಯಗೊಳಿಸಲಾಗಿದೆ.
ಸಿಮ್ ಹಂಚಿಕೆ ಮಾಡದಂತೆ ಸಲಹೆ
ತಮ್ಮ ಹೆಸರಿನಲ್ಲಿ ನೋಂದಾಯಿಸಿರುವ ಸಿಮ್ಗಳನ್ನು ಇತರರಿಗೆ ಮಾರಾಟ, ಬಾಡಿಗೆ, ಹಸ್ತಾಂತರ ಅಥವಾ ಬಳಕೆಗೆ ನೀಡಬಾರದು ಎಂದು DoT ಸೂಚಿಸಿದೆ. ಇಂತಹ ಸಂಪರ್ಕಗಳನ್ನು ಸೈಬರ್ ಅಪರಾಧ ಅಥವಾ ಇತರ ಅಕ್ರಮ ಚಟುವಟಿಕೆಗಳಿಗೆ ಬಳಸಿದರೆ ಮೂಲ ಚಂದಾದಾರರು ಕಾನೂನು ಸಮಸ್ಯೆ ಎದುರಿಸಬೇಕಾಗಬಹುದು.
ನಕಲಿ ದಾಖಲೆಗಳ ಮೂಲಕ ಸಿಮ್ ಪಡೆಯುವುದು, ತಿರುಚಿದ IMEI ಹೊಂದಿರುವ ಸಾಧನ ಅಥವಾ ಸಿಮ್ ಬಾಕ್ಸ್ ಬಳಸುವುದು ಹಾಗೂ CLI ಸೇರಿದಂತೆ ಟೆಲಿಕಾಂ ಐಡೆಂಟಿಫೈಯರ್ಗಳನ್ನು ಬದಲಿಸುವ ಸೇವೆಗಳನ್ನು ಬಳಸುವುದರಿಂದ ದೂರವಿರುವಂತೆ ಸೂಚಿಸಲಾಗಿದೆ.
ಸಂಚಾರ್ ಸಾಥಿಯಲ್ಲಿ ಪರಿಶೀಲಿಸಿ
ತಮ್ಮ ಹೆಸರಿನಲ್ಲಿ ಎಷ್ಟು ಮೊಬೈಲ್ ಸಂಪರ್ಕಗಳು ನೋಂದಣಿಯಾಗಿವೆ ಎಂಬುದನ್ನು ಸಂಚಾರ್ ಸಾಥಿ ಪೋರ್ಟಲ್ ಮತ್ತು ಮೊಬೈಲ್ ಆ್ಯಪ್ ಮೂಲಕ ನಿಯಮಿತವಾಗಿ ಪರಿಶೀಲಿಸುವಂತೆ DoT ಸಲಹೆ ನೀಡಿದೆ. ಅನಧಿಕೃತ ಅಥವಾ ಅಗತ್ಯವಿಲ್ಲದ ಸಂಪರ್ಕಗಳನ್ನು ಅಲ್ಲಿಯೇ ವರದಿ ಮಾಡಿ ನಿರ್ಬಂಧಿಸಬಹುದು.
ಅದೇ ವೇದಿಕೆಯ ‘ನಿಮ್ಮ ಮೊಬೈಲ್ ಹ್ಯಾಂಡ್ಸೆಟ್ನ ನೈಜತೆಯನ್ನು ಪರಿಶೀಲಿಸಿ’ ಸೌಲಭ್ಯದ ಮೂಲಕ IMEI ಆಧರಿಸಿ ಮೊಬೈಲ್ನ ಬ್ರ್ಯಾಂಡ್, ಮಾದರಿ ಮತ್ತು ತಯಾರಕರ ವಿವರಗಳನ್ನೂ ಪರಿಶೀಲಿಸಬಹುದು.
