ನವದೆಹಲಿ: ಭಾರತ-ಪಾಕಿಸ್ತಾನ ಅಂತಾರಾಷ್ಟ್ರೀಯ ಗಡಿಗೆ ಹೊಂದಿಕೊಂಡಿರುವ ರಾಜಸ್ಥಾನದ ವಾಯುಪ್ರದೇಶದಲ್ಲಿ ಭಾರತೀಯ ವಾಯುಪಡೆ (IAF) ಸೆಪ್ಟೆಂಬರ್ 21ರಿಂದ ಅಕ್ಟೋಬರ್ 7ರವರೆಗೆ 17 ದಿನಗಳ ಬೃಹತ್ ಸಮರಾಭ್ಯಾಸ ನಡೆಸಲು ಸಜ್ಜಾಗಿದೆ. ಈ ಸಂಬಂಧ ವಾಯುಪಡೆ ಅಧಿಕೃತ NOTAM ಹೊರಡಿಸಿದ್ದು, ಗಡಿಭಾಗದಲ್ಲಿ ಪಾಕಿಸ್ತಾನದ ಆತಂಕ ಹೆಚ್ಚಿಸಿದೆ.
ವಾಯುಪ್ರದೇಶ ಸಂಪೂರ್ಣ ಕಾಯ್ದಿರಿಕೆ
ಜೈಸಲ್ಮೇರ್, ಬಾರ್ಮರ್, ಫಲೋದಿ, ಜೋಧ್ಪುರ ಹಾಗೂ ನಾಲಾ-ಬಿಕಾನೇರ್ ವಾಯುನೆಲೆಗಳ ವ್ಯಾಪ್ತಿಯ ಪ್ರದೇಶಗಳನ್ನು ಸಮರಾಭ್ಯಾಸಕ್ಕಾಗಿ ತಾತ್ಕಾಲಿಕವಾಗಿ ಕಾಯ್ದಿರಿಸಲಾಗಿದೆ. ಈ ಅವಧಿಯಲ್ಲಿ ನಾಗರಿಕ ವಿಮಾನಗಳ ಸಂಚಾರಕ್ಕೆ ನಿರ್ಬಂಧ ವಿಧಿಸಲಾಗಿದ್ದು, ಯುದ್ಧ ವಿಮಾನಗಳ ಹಾರಾಟಕ್ಕೆ ಅವಕಾಶ ಕಲ್ಪಿಸಲಾಗಿದೆ.
ಸಮರಾಭ್ಯಾಸದ ವೇಳೆ ವಿಮಾನಗಳು ಸುಮಾರು 40,000 ಅಡಿ ಎತ್ತರದವರೆಗೆ ಹಾರಾಟ ನಡೆಸಲಿವೆ. ಗುರುತಿಸಲಾಗಿರುವ ಕೆಲವು ಪ್ರದೇಶಗಳು ಪಾಕಿಸ್ತಾನದ ಅಂತಾರಾಷ್ಟ್ರೀಯ ಗಡಿಯಿಂದ ಕೇವಲ 20 ಕಿ.ಮೀ. ದೂರದಲ್ಲಿರುವುದು ಗಮನ ಸೆಳೆದಿದೆ.
ಪಾಕ್ನಲ್ಲಿ ತುರ್ತು ಸಮಾಲೋಚನೆ
ಭಾರತದ NOTAM ಬಿಡುಗಡೆಯಾದ ಬಳಿಕ ಪಾಕಿಸ್ತಾನದ ರಕ್ಷಣಾ ಸಚಿವಾಲಯ ಹಾಗೂ ಸೇನಾ ಅಧಿಕಾರಿಗಳು ಪರಿಸ್ಥಿತಿಯ ಕುರಿತು ತುರ್ತು ಸಮಾಲೋಚನೆ ನಡೆಸಿದ್ದಾರೆ ಎನ್ನಲಾಗಿದೆ. ಗಡಿಯಲ್ಲಿ ಕಣ್ಗಾವಲು ಹೆಚ್ಚಿಸಲಾಗಿದ್ದು, ಭಾರತೀಯ ಯುದ್ಧ ವಿಮಾನಗಳ ಚಲನವಲನಗಳ ಮೇಲೆ ನಿಗಾ ವಹಿಸಲು ರೇಡಾರ್ ವ್ಯವಸ್ಥೆಯನ್ನು ಸಕ್ರಿಯಗೊಳಿಸಲಾಗಿದೆ ಎಂದು ವರದಿಯಾಗಿದೆ.
‘ತರಂಗ್ ಶಕ್ತಿ 2026’ ಜತೆ ಸಮರಾಭ್ಯಾಸ
ಭಾರತದ ಈ ಸಮರಾಭ್ಯಾಸವು ಜೋಧ್ಪುರದಲ್ಲಿ ಸೆಪ್ಟೆಂಬರ್ 26ರಿಂದ ಅಕ್ಟೋಬರ್ 12ರವರೆಗೆ ನಡೆಯಲಿರುವ ಬಹುರಾಷ್ಟ್ರೀಯ ‘ತರಂಗ್ ಶಕ್ತಿ 2026’ ವಾಯು ಸಮರಾಭ್ಯಾಸದ ಅವಧಿಯೊಂದಿಗೂ ಹೊಂದಿಕೆಯಾಗಲಿದೆ.
ಅಮೆರಿಕ, ಬ್ರಿಟನ್, ಫ್ರಾನ್ಸ್ ಸೇರಿದಂತೆ ಹಲವು ದೇಶಗಳ ವಾಯುಪಡೆಗಳು ಇದರಲ್ಲಿ ಭಾಗವಹಿಸುವ ನಿರೀಕ್ಷೆಯಿದ್ದು, ವಿವಿಧ ವಾಯುಯುದ್ಧ ತಂತ್ರಗಳು ಮತ್ತು ಜಂಟಿ ಕಾರ್ಯಾಚರಣೆಗಳನ್ನು ಅಭ್ಯಾಸ ಮಾಡಲಿವೆ.
ರಫೇಲ್, ಸುಖೋಯ್ಗಳ ಶಕ್ತಿ ಪ್ರದರ್ಶನ
ಭಾರತೀಯ ವಾಯುಪಡೆಯ ರಫೇಲ್, ಸುಖೋಯ್-30MKI, ಮಿರಾಜ್-2000 ಮತ್ತು ತೇಜಸ್ ಯುದ್ಧ ವಿಮಾನಗಳು ಸಮರಾಭ್ಯಾಸದಲ್ಲಿ ಭಾಗವಹಿಸಲಿವೆ. ವಾಸ್ತವಿಕ ಯುದ್ಧ ಪರಿಸ್ಥಿತಿಯನ್ನು ಹೋಲುವ ಸನ್ನಿವೇಶಗಳಲ್ಲಿ ಸಂವಹನ, ಇಂಧನ ಮರುಪೂರಣ ಹಾಗೂ ರಾತ್ರಿ ಕಾರ್ಯಾಚರಣೆ ಸೇರಿದಂತೆ ವಿವಿಧ ಸಾಮರ್ಥ್ಯಗಳನ್ನು ಪರೀಕ್ಷಿಸಲಾಗುತ್ತದೆ.
NOTAM ಎಂದರೇನು?
ವಿಮಾನ ಪೈಲಟ್ಗಳು ಮತ್ತು ನಾಗರಿಕ ವಿಮಾನಯಾನ ಸಂಸ್ಥೆಗಳಿಗೆ ನಿರ್ದಿಷ್ಟ ವಾಯುಪ್ರದೇಶದಲ್ಲಿ ಮಿಲಿಟರಿ ತಾಲೀಮು, ಕ್ಷಿಪಣಿ ಪರೀಕ್ಷೆ ಅಥವಾ ಇತರ ಅಪಾಯಕಾರಿ ಚಟುವಟಿಕೆಗಳು ನಡೆಯಲಿರುವ ಕುರಿತು ಮುನ್ನೆಚ್ಚರಿಕೆ ನೀಡುವ ಅಧಿಕೃತ ಸುರಕ್ಷತಾ ಸೂಚನೆಯೇ NOTAM.
